आखिर मुलुक जता नजानुपर्ने थियो, सोही दिशातर्फ उन्मूख हुन थालेको छ । युगौंदेखि देशमा कायम रहेको जातीय सद्भाव द्वन्द्वमा रूपान्त्रित हुँदै गैरहेको छ । यस्तो गम्भीर परिस्थितिमा सत्ता संचालनको साँचो लिएका दलका शीर्ष नेता, अभिभावकीय भूमिका निभाउँदै जनतालाई संयमित हुन आव्हान गर्नुपर्नेमा साम्प्रदायिक सद्भाव भड्काउने दिशातर्फ अग्रसर भैरहेका छन् । देशका विभिन्न स्थानहरूमा जातीय द्वन्द्वका झिल्काहरू देखिइरहेका बेला आइतबार एकीकृत माओवादीका अध्यक्ष प्रचन्डले जनजातिहरूको एक समूहलाई “संघीयता विरोधीहरूको सडकमा उत्रिएर प्रतिवाद गर्न” आव्हान गरेका छन् । साम्प्रदायिक सद्भाव भड्काउन अभिप्रेरित गर्दै आएको उनको यो अभिव्यक्ति अत्यन्तै गैरजिम्मेवारपूर्ण र आपत्तिजनक छ । जातीय सद्भाव चाहने हरेक देशभक्त नेपालीहरूबाट यसको खुलेर विरोध गरिनुपर्छ ।